தேசவிரோதி

 நாய்களே நலமாய் வாழும் நாட்டில் - நாமோ நாயினும்

கடையர் ஆக்கப்பட்டோம்.

நண்டுகளே தனிவளை கொண்டிருக்க -

நாமோ அடிபட்ட

 நண்டுகளாய் பிடிபட்டோம்

நாரைகள்கூட நாலா திசையும்

போக - நாமோ நாலா புறமும்

சுவருக்குள் நசிபட்டோம்

மதிலுக்குள் மிதிபட்டோம்

நிழலுக்கும் நீதிமன்றம் நாடாத நாம் - நீசர்கள் என்றே நீதிமன்றில்

நிறுத்தப்பட்டோம் - நீங்காப்பழி

சுமந்து நெற்றியில் ஒட்டப்பட்டோம் 

மனுக்குல விரோதி என

மங்காப் பெயர் சொல்லி

மன்றங்களில் அறிவிக்கப்பட்டோம் - தேசத்தின்

மீது கொண்ட  பாசமெல்லாம் வெறும் வேசம் என்று

சொல்லி தேசவிரோதி

எனச் சுட்டுப் பட்டோம்

இலங்கை வரலாற்றில் நாம்

வெட்டப்பட்டோம் - இலங்கைச்

சிறைகளில் நாம் கட்டப்பட்டோம்

சிலரது தவறுகளால் வெட்கப்பட்டோம் - இறந்த உறவுகள் கண்டு வேதனைப்பட்டோம் - முழுதாய்

நாமே தான் நட்டப்பட்டோம் - 

நாட்டில் நாம் ஒதுக்கப்பட்டோம்

உலகெங்கும் வெறுக்கப்பட்டோம்

பேசும் வாய்கள் கட்டப்பட்டோம்

வாழும் உரிமை மறுக்கப்பட்டோம்

எழுத்துரிமை பறிக்கப்பட்டோம்

எம்மினத்தின் இடுப்பெலும்பு

முறிக்கப்பட்டோம் - ஒட்டு

மொத்தமாய் ஒடுக்கப்பட்டோம்

எம்மவலக் குரல் கேட்க 

யாருமின்றி தனிமைப்பட்டோம்

வளை - பொந்து

க
டையர் - இழிந்தோர்

நீசர் - தீயோர்

2020.11.09

06.30 PM

 #சிறை

#ஆறாம்_மாடி

#கொழும்பு01